വാട്സാപ്പ് ഉപയോക്താക്കൾ ഏറെ നാളായി കാത്തിരുന്ന പുതിയ ഫീച്ചർ എത്തുന്നു. ഇനി മുതൽ നിങ്ങളുടെ കോൺടാക്റ്റുകൾ ഓൺലൈനിൽ ഉണ്ടോ എന്ന് ചാറ്റ് ലിസ്റ്റിൽ തന്നെ അറിയാൻ സാധിക്കും.
മെറ്റാ ഉടമസ്ഥതയിലുള്ള വാട്സാപ്പ് നിലവിൽ ഇതിന്റെ ബീറ്റാ പരീക്ഷണം നടത്തിവരികയാണ്. ഫേസ്ബുക്ക് മെസഞ്ചർ, ടെലഗ്രാം തുടങ്ങിയ പ്ലാറ്റ്ഫോമുകളിൽ ഈ ഫീച്ചർ നേരത്തെ തന്നെയുണ്ട്.
ഉപയോക്താവ് ഓൺലൈനിൽ ആണെങ്കിൽ അവരുടെ പ്രൊഫൈൽ ചിത്രത്തിന് സമീപം ഒരു ചെറിയ പച്ച ഡോട്ട് തെളിയും. നിങ്ങൾ ചാറ്റ് ലിസ്റ്റ് നോക്കുമ്പോൾ തന്നെ ആരാണ് ഇപ്പോൾ ഓൺലൈനിൽ ഉള്ളതെന്ന് മനസ്സിലാക്കാൻ ഇതിലൂടെ സാധിക്കും.
നേരത്തെ ചാറ്റ് വിൻഡോ തുറന്നാൽ മാത്രമേ ഇത് കാണാൻ കഴിയുമായിരുന്നുള്ളൂ.
ആൻഡ്രോയിഡ് ബീറ്റാ പതിപ്പിന് പിന്നാലെ ഇപ്പോൾ ഐഒഎസ് (iOS) ബീറ്റാ വേർഷനിലും ഈ ഫീച്ചർ പരീക്ഷിക്കുന്നുണ്ട്. ബീറ്റാ വേർഷൻ 26.26.10.72-ലാണ് ഈ സൗകര്യം ഇപ്പോൾ ലഭ്യമാക്കിയിരിക്കുന്നത്.
വാട്സാപ്പിന്റെ സ്വകാര്യത നിയമങ്ങൾ പാലിച്ചുകൊണ്ട് തന്നെയായിരിക്കും ഈ ഫീച്ചർ പ്രവർത്തിക്കുക. ഉപയോക്താക്കൾ തങ്ങളുടെ ‘ലാസ്റ്റ് സീൻ’, ‘ഓൺലൈൻ’ സ്റ്റാറ്റസ് എന്നിവ മറച്ചുവെച്ചിട്ടുണ്ടെങ്കിൽ, അവരുടെ പ്രൊഫൈലിൽ പച്ച ഡോട്ട് കാണാൻ സാധിക്കില്ല. ഉപയോക്താക്കളുടെ സുരക്ഷയ്ക്ക് മെറ്റാ മുൻഗണന നൽകുന്നുണ്ട്.
നിലവിൽ തിരഞ്ഞെടുത്ത ബീറ്റാ ഉപയോക്താക്കൾക്ക് മാത്രമാണ് ഈ സൗകര്യം ലഭ്യമാകുന്നത്. പരീക്ഷണങ്ങളുടെ ഫലങ്ങൾ വിലയിരുത്തിയ ശേഷം വൈകാതെ തന്നെ ഈ ഫീച്ചർ എല്ലാവർക്കുമായി ലഭ്യമാക്കും.
പുതിയ അപ്ഡേറ്റിലൂടെ വാട്സാപ്പ് ആശയവിനിമയം കൂടുതൽ എളുപ്പമാക്കാൻ ശ്രമിക്കുകയാണ്.
