തൃശ്ശൂർ: എടമുട്ടം സ്വദേശിനിയായ ജ്യോതി (32)യെയും നവജാത ശിശുവിനെയും തൃശ്ശൂരിലെ ഒരു ലോഡ്ജിൽ മരിച്ച നിലയിൽ കണ്ടെത്തിയ സംഭവത്തിൽ അന്വേഷണം ശക്തമാക്കി പോലീസ്.
സംഭവവുമായി ബന്ധപ്പെട്ട് യുവതിയുടെ സുഹൃത്തും പാവറട്ടി സ്വദേശിയുമായ ഒരു ഓട്ടോഡ്രൈവറെ ഈസ്റ്റ് പോലീസ് കസ്റ്റഡിയിലെടുത്ത് ചോദ്യം ചെയ്യുകയാണ്.
പോലീസ് പറയുന്നതനുസരിച്ച് യുവതിയും സുഹൃത്തും കുറച്ചുകാലമായി അടുത്ത ബന്ധത്തിലായിരുന്നുവെന്നും ഇരുവരും ഇടയ്ക്കിടെ ലോഡ്ജിൽ മുറിയെടുത്തിരുന്നുവെന്നും വിവരമുണ്ട്.
ഇവർ കഴിഞ്ഞ മാസം 27-നാണ് ലോഡ്ജിൽ മുറിയെടുത്തതെന്ന് ജീവനക്കാർ പോലീസിനോട് മൊഴി നൽകിയിട്ടുണ്ട്.
ചൊവ്വാഴ്ച മുറി തുറക്കാത്തതിനെ തുടർന്ന് ജീവനക്കാർ ആശങ്ക പ്രകടിപ്പിക്കുകയും പിന്നീട് പോലീസിനെ വിവരം അറിയിക്കുകയുമായിരുന്നു.
പോലീസും അഗ്നിരക്ഷാസേനയും സ്ഥലത്തെത്തി വാതിൽ പൊളിച്ച് അകത്ത് പ്രവേശിച്ചപ്പോഴാണ് യുവതിയെയും കുഞ്ഞിനെയും മരിച്ച നിലയിൽ കണ്ടെത്തിയത്.
ബഹുനില കെട്ടിടത്തിന്റെ ഒന്നാംനിലയിലെ 108-ാം നമ്പർ മുറിയിലെ കട്ടിലിലായിരുന്നു മൃതദേഹങ്ങൾ കണ്ടെത്തിയത്.
പ്രസവത്തിനിടെയുണ്ടായ സങ്കീർണതകളാണ് മരണകാരണമെന്നാണ് പ്രാഥമിക നിഗമനമെങ്കിലും പോസ്റ്റുമോർട്ടം റിപ്പോർട്ട് ലഭിച്ച ശേഷമേ അന്തിമ നിഗമനത്തിലെത്താനാകൂ.
യുവതി ഗർഭിണിയാണെന്ന വിവരം തങ്ങൾക്ക് അറിയില്ലായിരുന്നുവെന്നാണ് ലോഡ്ജ് ജീവനക്കാർ പോലീസിനോട് പറഞ്ഞത്.
അതേസമയം, രണ്ട് വർഷം മുൻപ് ഇതേ ഓട്ടോഡ്രൈവർക്കെതിരെ യുവതി പീഡനപരാതി നൽകിയിരുന്നുവെന്ന വിവരവും അന്വേഷണത്തിന്റെ ഭാഗമായിട്ടുണ്ട്.
യുവതിയുടെ കുടുംബ പശ്ചാത്തലവും സുഹൃത്തിന്റെ വിവരങ്ങളും കേന്ദ്രീകരിച്ച് അന്വേഷണം പുരോഗമിക്കുകയാണെന്ന് പോലീസ് അറിയിച്ചു.
സിറ്റി എ.സി.പി. എം. ശശിധരന്റെ നേതൃത്വത്തിലുള്ള സംഘമാണ് സ്ഥലത്ത് പരിശോധനകൾ നടത്തിയത്.
മൃതദേഹങ്ങൾ മെഡിക്കൽ കോളജ് മോർച്ചറിയിലേക്ക് മാറ്റിയതായും ബുധനാഴ്ച പോസ്റ്റുമോർട്ടം നടത്തുമെന്നും പോലീസ് അറിയിച്ചു.
