പശ്ചിമബംഗാൾ മുൻ മുഖ്യമന്ത്രിയും തൃണമൂൽ കോൺഗ്രസ് നേതാവുമായ മമതാ ബാനർജിയെ കത്തികൊണ്ട് ആക്രമിക്കാൻ ശ്രമിച്ചെന്ന പരാതിയിൽ യുവതിയെ പൊലീസ് കസ്റ്റഡിയിലെടുത്തു.
തനിഷ്ത സാഹ എന്ന യുവതിക്കെതിരെയാണ് നടപടി. കൊൽക്കത്തയിലെ കാളിഘട്ടിലുള്ള മമതയുടെ വസതിക്ക് പുറത്താണ് സംഭവം നടന്നതെന്നാണ് റിപ്പോർട്ട്.
ദുർഗാപൂജ പന്തൽ ഉദ്ഘാടനം ചെയ്യുന്നതിനായി വീട്ടിൽനിന്ന് പുറത്തിറങ്ങിയ മമതാ ബാനർജിക്ക് സമീപത്തേക്ക് യുവതി എത്തുകയായിരുന്നു.
സുരക്ഷാവലയം മറികടന്ന് ഉള്ളിലേക്ക് കടക്കാൻ ശ്രമിച്ച യുവതിയെ തൃണമൂൽ കോൺഗ്രസ് പ്രവർത്തകരും സുരക്ഷാ ഉദ്യോഗസ്ഥരും ചേർന്ന് തടഞ്ഞു.
യുവതി മമതാ ബാനർജിയുടെ അനന്തരവളാണെന്ന് അവകാശപ്പെട്ടതായി മമതയുടെ അടുത്ത അനുയായിയും എംപിയുമായ ഡോല സെൻ ആരോപിച്ചു.
സംഭവവുമായി ബന്ധപ്പെട്ട് ഡോല സെൻ കാളിഘട്ട് പൊലീസ് സ്റ്റേഷനിൽ പരാതി നൽകിയതിന് പിന്നാലെയാണ് യുവതിയെ കസ്റ്റഡിയിലെടുത്തത്.
യുവതി ലഹരിയിലായിരുന്നുവെന്നും അസഭ്യം പറയുകയും വസ്ത്രത്തിനുള്ളിൽ ഒളിപ്പിച്ച കത്തി ഉപയോഗിച്ച് ആക്രമിക്കാൻ ശ്രമിക്കുകയും ചെയ്തുവെന്നാണ് പരാതിയിലെ ആരോപണം.
സംഭവത്തിൽ കൂടുതൽ അന്വേഷണം നടത്തിവരികയാണെന്ന് പൊലീസ് അറിയിച്ചു.
സെഡ് പ്ലസ് സുരക്ഷയുള്ള മുൻ മുഖ്യമന്ത്രിക്ക് നേരെയുണ്ടായ സംഭവത്തിൽ സുരക്ഷാവീഴ്ചയുണ്ടായെന്ന ആശങ്കയിലാണ് തൃണമൂൽ കോൺഗ്രസ്. സംഭവത്തിന്റെ സാഹചര്യങ്ങളും യുവതിയുടെ ഉദ്ദേശ്യവും സംബന്ധിച്ച് പൊലീസ് അന്വേഷണം തുടരുകയാണ്.
