വിട്ടുമാറാത്ത മൈഗ്രേൻ അഥവാ ചെന്നിക്കുത്ത് മൂലം ബുദ്ധിമുട്ടുന്നവർക്ക് ആശ്വാസകരമായ വാർത്തയാണിത്. ചെവിയിലെ പ്രത്യേക ഭാഗങ്ങളിൽ നടത്തുന്ന അക്യുപങ്ചർ ചികിത്സയിലൂടെ മൈഗ്രേൻ വേദന കുറയ്ക്കാമെന്ന് കണ്ടെത്തലുണ്ട്.
ബാഴ്സലോണയിൽ നടന്ന 2026-ലെ ഫെഡറേഷൻ ഓഫ് യൂറോപ്യൻ ന്യൂറോ സൊസൈറ്റി (FENS) ഫോറത്തിലാണ് ഈ പഠനം അവതരിപ്പിച്ചത്.
ബ്രസീലിലെ സതേൺ സാന്താ കാറ്ററീന സർവകലാശാലയിലെ ഫെർണാണ്ട ബെല്ലിന്റെ നേതൃത്വത്തിലായിരുന്നു ഈ പഠനം നടന്നത്. ‘ഓറിക്കുലോതെറാപ്പി (Auriculotherapy)’ എന്ന ഈ ചികിത്സാ രീതി വിട്ടുമാറാത്ത മൈഗ്രേൻ ഉള്ള 68 സ്ത്രീകളിലാണ് പരീക്ഷിച്ചത്. രോഗികളെ രണ്ട് സംഘങ്ങളായി തിരിച്ച് നടത്തിയ പഠനത്തിൽ അത്ഭുതകരമായ ഫലങ്ങളാണ് ലഭിച്ചത്.
ഒരു വിഭാഗത്തിന് യഥാർത്ഥ ഓറിക്കുലോതെറാപ്പി നൽകി. മറ്റൊരു വിഭാഗത്തിന് കൃത്രിമ ചികിത്സ അഥവാ ‘ഷാം ട്രീറ്റ്മെന്റ്’ നൽകി.
മുപ്പത് ദിവസത്തിന് ശേഷം രണ്ട് വിഭാഗങ്ങളിലും വേദനയുടെ തോത് കുറഞ്ഞതായി ഗവേഷകർ കണ്ടെത്തി. യഥാർത്ഥ ചികിത്സയിൽ 18 ശതമാനവും കൃത്രിമ ചികിത്സയിൽ 13 ശതമാനവും കുറവുണ്ടായി.
തലച്ചോറിലെ രക്തയോട്ടവും ഓക്സിജന്റെ അളവും കൃത്യമായി അളക്കാൻ ഹെമോഎൻസെഫലോഗ്രാഫി എന്ന സാങ്കേതികവിദ്യ ഉപയോഗിച്ചു. ചെവിയിലെ ഏത് തരത്തിലുള്ള ഉത്തേജനവും വേദന കുറയ്ക്കാൻ സഹായിക്കുമെന്നാണ് ഇതിൽ നിന്നുള്ള നിഗമനം.
നാഡീവ്യവസ്ഥയും രോഗപ്രതിരോധ വ്യവസ്ഥയും തമ്മിലുള്ള ആശയവിനിമയത്തെ സ്വാധീനിക്കാൻ ഈ ചികിത്സയ്ക്ക് കഴിയുമെന്ന് വിദഗ്ധർ ചൂണ്ടിക്കാട്ടുന്നു.
മൈഗ്രേൻ പുരുഷന്മാരേക്കാൾ സ്ത്രീകളിലാണ് കൂടുതൽ കാണപ്പെടുന്നത്. നിലവിലുള്ള ചികിത്സകൾക്ക് പകരമല്ല, മറിച്ച് ഇതൊരു മികച്ച പൂരക ചികിത്സയാകാമെന്ന് ഗവേഷകർ പറയുന്നു. കൂടുതൽ പേരിലേക്ക് ഈ പഠനം വ്യാപിപ്പിക്കാനാണ് ഗവേഷകരുടെ തീരുമാനം. ഇത്തരത്തിലുള്ള പുതിയ പഠനങ്ങൾ മൈഗ്രേൻ ബാധിതർക്ക് വലിയൊരു പ്രതീക്ഷ നൽകുന്നുണ്ട്.
