നെടുമ്പാശ്ശേരി അത്താണിയിൽ ഇന്ന് രാവിലെയുണ്ടായ ബൈക്കപകടത്തിൽ തൃശൂർ സ്വദേശികളായ രണ്ട് യുവാക്കൾ മരിച്ചു. ഗോകുൽ (23), അശ്വിൻ (23) എന്നിവരാണ് മരിച്ചത്. ഇവർ അടുത്ത സുഹൃത്തുക്കളാണ്.
ആലുവ കരിമല്ലൂരിലെ ഫാബ്രിക്കേഷൻ യൂണിറ്റിലെ ജീവനക്കാരാണ് ഇരുവരും. ഗോകുലിന്റെ 23-ാം ജന്മദിനമായിരുന്നു ഇന്നലെ. സുഹൃത്തുക്കൾക്കൊപ്പം രാത്രി തുടങ്ങിയ ആഘോഷം പുലർച്ചെ വരെ നീണ്ടു.
ബുധനാഴ്ച രാവിലെ 7.15-ന് അത്താണി ജംക്ഷന് സമീപമായിരുന്നു അപകടം.
ബൈക്കിൽ ആലുവ ഭാഗത്തേക്ക് പോയ ഇവർ യു-ടേൺ എടുത്ത് അത്താണിയിലേക്ക് മടങ്ങുകയായിരുന്നു.
മറ്റൊരു വാഹനത്തെ മറികടക്കാൻ ശ്രമിക്കുമ്പോൾ ഗോകുലിന് ബൈക്കിന്റെ നിയന്ത്രണം നഷ്ടപ്പെട്ടു. ബൈക്ക് മീഡിയനിൽ ഉരസി കോൺക്രീറ്റ് ബാരിയറിലൂടെ 100 മീറ്ററോളം തെന്നിനീങ്ങി പോസ്റ്റിലിടിച്ചു.
പോസ്റ്റിലിടിച്ച ശേഷവും ബൈക്ക് 50 മീറ്ററോളം തെറിച്ചുപോയി. ഇരുവരുടെയും തലയ്ക്ക് ഗുരുതരമായ പരുക്കേറ്റു. ഗോകുൽ സംഭവസ്ഥലത്തുതന്നെ അബോധാവസ്ഥയിലായി. ഗുരുതരമായി പരുക്കേറ്റ അശ്വിൻ ആശുപത്രിയിലേക്കുള്ള യാത്രക്കിടെയാണ് മരിച്ചത്.
അപകടസമയത്ത് ഇരുവരും ഹെൽമെറ്റ് ധരിച്ചിരുന്നോ എന്നത് പോലീസ് പരിശോധിക്കുന്നുണ്ട്. മൃതദേഹങ്ങൾ പോസ്റ്റ്മോർട്ടത്തിന് ശേഷം ബന്ധുക്കൾക്ക് വിട്ടുനൽകും. സംഭവത്തിൽ നെടുമ്പാശ്ശേരി പോലീസ് കേസെടുത്ത് അന്വേഷണം ആരംഭിച്ചു.
