ശബരിമല സ്വര്ണക്കൊള്ള കേസിൽ ഗുരുതരമായ കണ്ടെത്തലുകളുമായി അന്വേഷണ സംഘത്തിന്റെ റിമാൻഡ് റിപ്പോർട്ട് പുറത്തുവന്നു. മുൻ ദേവസ്വം ബോർഡ് പ്രസിഡന്റ് പി എസ് പ്രശാന്ത് കേസിൽ നേരിട്ട് ഇടപെട്ടതായി റിപ്പോർട്ടിൽ വ്യക്തമാക്കുന്നു.
പ്രശാന്തും മുൻ ബോർഡ് അംഗം അജികുമാറും ചേർന്ന് ഗൂഢാലോചന നടത്തിയതിന് വ്യക്തമായ തെളിവുകളുണ്ട്. ഔദ്യോഗിക കൃത്യനിർവഹണം പൂർണ്ണമായും മറന്ന് ഇവർ ബോധപൂർവം വീഴ്ച വരുത്തിയതായി എസ്ഐടി ചൂണ്ടിക്കാണിക്കുന്നു.
സ്വർണ്ണപ്പാളികൾ അറ്റകുറ്റപ്പണിക്കായി കൊണ്ടുപോകുന്നതിന് പ്രതികൾ വ്യാജ കരാർ ഉണ്ടാക്കുകയാണുണ്ടായത്. ശബരിമലയിലെ സ്വർണം ഇളക്കി മാറ്റി വീണ്ടും പ്ലേറ്റ് ചെയ്യാനുള്ള സാങ്കേതിക സംവിധാനം ചെന്നൈ സ്മാർട്ട് ക്രിയേഷൻസിനില്ലെന്ന് തിരുവാഭരണം കമ്മീഷണർ റജിലാൽ റിപ്പോർട്ട് നൽകിയിരുന്നു.
2025 ജൂലൈ 30-നാണ് റജിലാൽ ദേവസ്വം സെക്രട്ടറിക്ക് ഈ നിർണായക റിപ്പോർട്ട് സമർപ്പിച്ചത്. സ്വർണം പൂശാൻ പരമ്പരാഗത രീതി മാത്രം സ്വീകരിക്കണം എന്നായിരുന്നു അദ്ദേഹത്തിന്റെ പ്രധാന ശുപാർശ.
എന്നാൽ തിരുവാഭരണം കമ്മീഷണറുടെ ഈ റിപ്പോർട്ട് തള്ളിക്കളയാൻ പി എസ് പ്രശാന്ത് തയ്യാറാകുകയായിരുന്നു.
പാളികൾ ചെന്നൈയിലേക്ക് തന്നെ കൊണ്ടുപോകണമെന്ന് പ്രശാന്ത് സെക്രട്ടറിക്ക് കർശന നിർദ്ദേശം നൽകി. ഇതിനായി കത്ത് നൽകിയ പ്രശാന്ത്, റജിലാലിൽ കടുത്ത സമ്മർദ്ദം ചെലുത്തി അനുകൂല തീരുമാനം എടുത്തു.
തുടർന്ന് 2025 ഓഗസ്റ്റ് രണ്ടിന് ചേർന്ന പ്രത്യേക ബോർഡ് യോഗം ഇതിന് അനുമതി നൽകിയതായി റിപ്പോർട്ടിൽ പറയുന്നു. ചെന്നൈയിലേക്ക് പാളികൾ കൊണ്ടുപോകുന്നതിനായി പിന്നീട് വ്യാജ രേഖകളും കൃത്രിമമായി തയ്യാറാക്കി. നിയമനുസൃതമായ യാതൊരുവിധ കരാറും ആ സമയത്ത് നിലവിലുണ്ടായിരുന്നില്ല എന്നതാണ് ശ്രദ്ധേയം.
പാളികൾ ചെന്നൈയിൽ എത്തിച്ച ശേഷമാണ് ബെല്ലാരിയിൽ നിന്നും മുദ്രപത്രം സംഘടിപ്പിച്ചത്. 2025 ഓഗസ്റ്റ് എട്ടിന് ഉണ്ണികൃഷ്ണൻ പോറ്റിയാണ് ഇതിനായി മുദ്രപത്രം വാങ്ങിയത്. തുടർന്ന് ഓഗസ്റ്റ് പത്താം തീയതി പ്രതികൾ വ്യാജ കരാറിൽ ഒപ്പുവെക്കുകയാണുണ്ടായത്.
ചെന്നൈയിൽ എത്തിച്ച പന്ത്രണ്ട് പാളികളിൽ നാലെണ്ണത്തിൽ നിന്നും സ്വർണം വേർതിരിച്ചെടുക്കുകയും ചെയ്തു. 2019-ലെ മുൻകാല സ്വര്ണക്കൊള്ള മറച്ചു വെക്കുന്നതിനുള്ള വലിയൊരു ഗൂഢാലോചനയാണ് ഇതിലൂടെ പുറത്തുവന്നിട്ടുള്ളത്. ശബരിമലയിലെ സ്വർണം തുടർച്ചയായി നഷ്ടമാകുന്ന വിധത്തിൽ പ്രശാന്തും അജികുമാറും പ്രവർത്തിച്ചുവെന്നാണ് പ്രധാന കണ്ടെത്തൽ.
