കോഴിക്കോട്: പെരുവയലിൽ പോലീസ് സംഘത്തിനുനേരെ ഗുണ്ടാ ആക്രമണം. പ്രവാസി വ്യവസായിയെ തട്ടിക്കൊണ്ടുപോയ കേസ് അന്വേഷിക്കാനെത്തിയതായിരുന്നു സംഘം. പാലക്കാട് നിന്നുള്ള എസ്ഐടി ഉദ്യോഗസ്ഥർക്ക് നേരെയാണ് അക്രമമുണ്ടായത്. ശനിയാഴ്ച രാവിലെ ഒൻപത് മണിയോടെയായിരുന്നു സംഭവം.
കോടശേരി താഴത്തുള്ള വില്ലയിലാണ് പ്രതികൾ ഒളിവിൽ കഴിഞ്ഞിരുന്നത്. വിവരമറിഞ്ഞെത്തിയ പോലീസിനെ കണ്ടതോടെ പ്രതികൾ അക്രമം തുടങ്ങി.
ഇവർ പോലീസിന് നേരെ തോക്കുചൂണ്ടുകയും സ്ഫോടകവസ്തു എറിയുകയും ചെയ്തു. ആക്രമണത്തിൽ നാല് പോലീസുകാർക്ക് സാരമായി പരിക്കേറ്റു.
വിഷ്ണു സൽമാൻ, ആട് ഷമീർ, ഡേവിസ്, ജാംസൺ എന്നിവരാണ് വില്ലയിലുണ്ടായിരുന്നത്. ഇവരാണ് പോലീസിനെ ആക്രമിച്ചതെന്ന് അധികൃതർ സ്ഥിരീകരിച്ചു.
ഉദ്യോഗസ്ഥരുടെ മുഖത്തും ശരീരത്തിന്റെ പല ഭാഗങ്ങളിലും പരിക്കുകളുണ്ട്. പോലീസിനെ ആക്രമിച്ച ശേഷം പ്രതികൾ വില്ലയിൽ നിലയുറപ്പിച്ചു.
തുടർന്ന് മാവൂർ, കുന്ദമംഗലം സ്റ്റേഷനുകളിൽ നിന്ന് കൂടുതൽ പോലീസുകാർ എത്തി. ശക്തമായ ഇടപെടലിലൂടെ പ്രതികളെ പോലീസ് സംഘം കീഴ്പ്പെടുത്തി. പരിക്കേറ്റ ഉദ്യോഗസ്ഥരെ ഉടൻ തന്നെ ആശുപത്രിയിൽ പ്രവേശിപ്പിച്ചു.
പ്രവാസി വ്യവസായിയെ തട്ടിക്കൊണ്ടുപോയി 70 കോടി രൂപ മോചനദ്രവ്യം ആവശ്യപ്പെട്ട കേസിലെ പ്രതികളാണിവർ. അന്വേഷണത്തിന്റെ ഭാഗമായാണ് പോലീസ് സംഘം ഇവിടെയെത്തിയത്. പ്രതികളുടെ സംഘത്തിൽ കൂടുതൽ ആളുകളുണ്ടോ എന്ന് പോലീസ് പരിശോധിക്കുന്നുണ്ട്.
വിശദമായ ചോദ്യം ചെയ്യലിനായി പ്രതികളെ കസ്റ്റഡിയിൽ വിട്ടുനൽകും. സംഭവത്തിൽ വൻ പോലീസ് സന്നാഹം പെരുവയലിൽ ക്യാമ്പ് ചെയ്യുന്നുണ്ട്. പ്രദേശത്ത് സുരക്ഷ കർശനമാക്കിയതായി ഉന്നത പോലീസ് ഉദ്യോഗസ്ഥർ അറിയിച്ചു.
