രാഷ്ട്രീയ ജീവിതത്തിലും പൊതുപ്രവർത്തനത്തിലും പതിറ്റാണ്ടുകളുടെ അനുഭവസമ്പത്തുള്ള സോണിയ ഗാന്ധി സാമൂഹിക മാധ്യമ രംഗത്തേക്ക്.
ആദ്യമായി ഇൻസ്റ്റഗ്രാമിൽ അക്കൗണ്ട് ആരംഭിച്ച സോണിയ ഗാന്ധി, തന്റെ ഓർമ്മക്കുറിപ്പുകളുടെ സമാഹാരമായ ‘Belonging: A Journey of Love’ എന്ന പുസ്തകത്തിന്റെ ആദ്യ എഴുത്തുകാരി പതിപ്പ് ഏറ്റുവാങ്ങുന്ന ദൃശ്യങ്ങൾ പങ്കുവെച്ചുകൊണ്ടാണ് പുതിയ ചുവടുവെപ്പ് നടത്തിയത്.
“ഈ നിമിഷങ്ങൾ നിങ്ങളുമായി ഏറെ സന്തോഷത്തോടെ പങ്കുവയ്ക്കുന്നു. സ്നേഹത്തിന്റെയും ഉത്തരവാദിത്തത്തിന്റെയും നഷ്ടങ്ങളുടെയും കണ്ടെത്തലുകളുടെയും കഥയാണിത്” എന്ന കുറിപ്പോടെയാണ് സോണിയ തന്റെ ആദ്യ ഇൻസ്റ്റഗ്രാം പോസ്റ്റ് പങ്കുവെച്ചത്.
അടുത്ത മാസം പത്തിന് ഡൽഹിയിൽ പുസ്തകത്തിന്റെ ഔദ്യോഗിക പ്രകാശനം നടക്കും.
ഇറ്റലിയിലെ ബാല്യകാലം മുതൽ രാജീവ് ഗാന്ധിയുമായുള്ള വിവാഹം വരെ നീളുന്ന വ്യക്തിജീവിതത്തിലെ നിർണായക അധ്യായങ്ങളും, ഇന്ദിര ഗാന്ധിയുടെയും രാജീവ് ഗാന്ധിയുടെയും വിയോഗം സൃഷ്ടിച്ച ആഘാതങ്ങളും, പിന്നീട് സജീവ രാഷ്ട്രീയത്തിലേക്കുള്ള കടന്നുവരവുമെല്ലാം പുസ്തകത്തിൽ ഇടംപിടിക്കുന്നുണ്ട്. വ്യക്തിപരമായ അനുഭവങ്ങളിലൂടെയും ഓർമകളിലൂടെയും തന്റെ ജീവിതയാത്ര വായനക്കാരുമായി പങ്കുവെക്കുകയാണ് സോണിയ ഗാന്ധി.
പുസ്തകത്തിന്റെ പ്രസാധനവുമായി ബന്ധപ്പെട്ടും നേരത്തെ വിവാദങ്ങൾ ഉയർന്നിരുന്നു.
പെൻഗ്വിൻ റാൻഡം ഹൗസ് ആദ്യം പ്രസിദ്ധീകരണം ഏറ്റെടുത്തിരുന്നെങ്കിലും ചില ഭാഗങ്ങളിൽ മാറ്റം വരുത്തണമെന്ന സമ്മർദത്തെ സോണിയ ഗാന്ധി അംഗീകരിച്ചില്ലെന്നാണ് റിപ്പോർട്ടുകൾ.
തുടർന്ന് ഹാർപ്പർകോളിൻസ് പുസ്തകത്തിന്റെ പ്രസാധകരായി രംഗത്തെത്തി. കേന്ദ്രസർക്കാരിന്റെ ഇടപെടലാണ് പെൻഗ്വിൻ പിന്മാറാൻ കാരണമെന്ന ആരോപണവും കോൺഗ്രസ് ഉന്നയിച്ചിരുന്നു.
യുവതലമുറ ഉൾപ്പെടെ സജീവമായി ഉപയോഗിക്കുന്ന ഇൻസ്റ്റഗ്രാമിലേക്കുള്ള സോണിയ ഗാന്ധിയുടെ കടന്നുവരവ് രാഷ്ട്രീയമായും ശ്രദ്ധ നേടുന്നുണ്ട്.
പ്രധാനമന്ത്രി നരേന്ദ്ര മോദി ഉൾപ്പെടെയുള്ള പ്രമുഖർ സാമൂഹിക മാധ്യമങ്ങളിലൂടെ നേരിട്ട് ജനങ്ങളുമായി സംവദിക്കുന്ന കാലത്ത്, ഇതുവരെ വ്യക്തിപരമായി സാമൂഹിക മാധ്യമങ്ങളിൽ സജീവമാകാതിരുന്ന സോണിയയുടെ പുതിയ നീക്കം കൗതുകത്തോടെയാണ് രാഷ്ട്രീയലോകം വീക്ഷിക്കുന്നത്.
ഇതുവരെ കോൺഗ്രസ് പാർട്ടിയുടെ ഔദ്യോഗിക സാമൂഹിക മാധ്യമ അക്കൗണ്ടുകളിലൂടെയും മറ്റ് ആശയവിനിമയ സംവിധാനങ്ങളിലൂടെയുമായിരുന്നു സോണിയ ഗാന്ധിയുടെ പ്രസ്താവനകളും നിലപാടുകളും പൊതുജനങ്ങളിലേക്ക് എത്തിയിരുന്നത്.
ആദ്യ ഇൻസ്റ്റഗ്രാം പോസ്റ്റിലൂടെ വ്യക്തിജീവിതത്തിലെ ഓർമകളും പുതിയ പുസ്തകത്തിന്റെ വിശേഷങ്ങളും നേരിട്ട് പങ്കുവെച്ചിരിക്കുകയാണ് അവർ.
