കൊച്ചി: ആരോഗ്യ വകുപ്പ് ഡയറക്ടർ (ഡിഎച്ച്എസ്) സ്ഥാനത്തുനിന്ന് ഡോ. കെ.ജെ. റീനയെ മാറ്റിയ സർക്കാർ നടപടിക്ക് ഹൈക്കോടതി അംഗീകാരം.
സർക്കാർ നൽകിയ ഹർജിയിൽ ജസ്റ്റിസുമാരായ അനിൽ കെ. നരേന്ദ്രൻ, ജസ്റ്റിസ് എസ്. മുരളീകൃഷ്ണ എന്നിവരടങ്ങുന്ന ഡിവിഷൻ ബെഞ്ചാണ് വിധി പുറപ്പെടുവിച്ചത്.
നേരത്തെ, സ്ഥലംമാറ്റം സ്റ്റേ ചെയ്തുകൊണ്ട് കേരള അഡ്മിനിസ്ട്രേറ്റീവ് ട്രൈബ്യൂണൽ ഉത്തരവിട്ടിരുന്നു.
എന്നാൽ, ഈ ഉത്തരവ് ഹൈക്കോടതി റദ്ദാക്കി. സ്ഥലംമാറ്റവുമായി ബന്ധപ്പെട്ട പരാതി ട്രൈബ്യൂണൽ തന്നെ പരിഗണിച്ച് തീർപ്പാക്കണമെന്ന് കോടതി നിർദേശിച്ചു.
പുതിയ ഡയറക്ടറുടെ ചുമതല ഡോ. വി. മീനാക്ഷി ഇതിനകം ഏറ്റെടുത്ത കാര്യവും കോടതി പരിഗണിച്ചു.
ജൂൺ 13-ന് തന്നെ അവർ ചുമതലയേറ്റിരുന്നു. ഈ വസ്തുത കൂടി കണക്കിലെടുത്താണ് ഡിവിഷൻ ബെഞ്ചിന്റെ സുപ്രധാന നടപടി. സർക്കാർ ഭാഗം വ്യക്തമാക്കുന്നതായിരുന്നു കോടതിയുടെ ഈ ഉത്തരവ്.
