വിപണിയിലെ പെട്രോളിൽ 20 ശതമാനം എഥനോൾ ചേർത്തതിന് പിന്നാലെ ഡീസലിലും മാറ്റത്തിന് കേന്ദ്ര സർക്കാർ ഒരുങ്ങുന്നു. ഡീസലിൽ ബയോ ഇന്ധനം വ്യാപകമാക്കാനാണ് കേന്ദ്രം ഇപ്പോൾ ലക്ഷ്യമിടുന്നത്.
പരീക്ഷണാടിസ്ഥാനത്തിൽ ഡീസലിൽ രണ്ട് ശതമാനം ഐസോബ്യൂട്ടനോൾ ചേർക്കുന്ന നടപടികൾ ആരംഭിച്ചു കഴിഞ്ഞു. ഭാവിയിൽ ഇത് 15 ശതമാനം വരെയായി ഉയർത്താനാണ് സർക്കാർ ലക്ഷ്യമിടുന്നത്. കേന്ദ്ര ഗതാഗത മന്ത്രി നിതിൻ ഗഡ്കരിയാണ് ഈ സുപ്രധാന വിവരം ഔദ്യോഗികമായി വ്യക്തമാക്കിയത്.
സർക്കാരിന്റെ ബദൽ ഇന്ധന നയത്തിന്റെ ഭാഗമായാണ് ഈ പുതിയ നടപടിയെന്ന് അദ്ദേഹം പറഞ്ഞു. ഫോസിൽ ഇന്ധനങ്ങളെ ആശ്രയിക്കുന്നത് കുറയ്ക്കുകയാണ് ഇതിലൂടെ രാജ്യം ലക്ഷ്യമിടുന്നത്.
ഡീസലിൽ നേരിട്ട് എഥനോൾ ചേർക്കാൻ സാങ്കേതികമായി കഴിയില്ലെന്ന് ഗഡ്കരി ചൂണ്ടിക്കാണിച്ചു. അതുകൊണ്ടാണ് എഥനോളിൽ നിന്ന് പ്രത്യേകമായി ഐസോബ്യൂട്ടനോൾ തയ്യാറാക്കാൻ തീരുമാനിച്ചത്.
ഈ ബയോ ഇന്ധനം ഡീസലിൽ ചേർക്കുന്നതിനുള്ള കൃത്യമായ പദ്ധതികൾ മന്ത്രാലയം തയ്യാറാക്കിയിട്ടുണ്ട്. ഡീസലിന് മികച്ചൊരു ബദലായി ഐസോബ്യൂട്ടനോൾ പ്രയോജനപ്പെടുത്തുകയാണ് സർക്കാരിന്റെ പ്രധാന ലക്ഷ്യം.
ഇതുമായി ബന്ധപ്പെട്ട് നടത്തിയ ആദ്യഘട്ട പരീക്ഷണ പദ്ധതികളിൽ മികച്ച ഫലമാണ് ലഭിച്ചതെന്നും അദ്ദേഹം അവകാശപ്പെട്ടു. ജനറേറ്ററുകൾ എഥനോളിലും ഐസോബ്യൂട്ടനോളിലും വിജയകരമായി പ്രവർത്തിച്ചതായും മന്ത്രി കൂട്ടിച്ചേർത്തു.
സാധാരണ ബയോ ഇന്ധനങ്ങളെ അപേക്ഷിച്ച് ഉയർന്ന ഊർജ സാന്ദ്രതയുള്ള ഇന്ധനമാണ് ഐസോബ്യൂട്ടനോൾ. വാഹനങ്ങളുടെ എൻജിനുകൾക്ക് അനുയോജ്യമായ രീതിയിലാണ് ഇത് ശാസ്ത്രീയമായി തയ്യാറാക്കിയിരിക്കുന്നത്.
മറ്റു ബയോ ഇന്ധനങ്ങളെ അപേക്ഷിച്ച് ഇതിൽ മലിനീകരണം വളരെ കുറവാണെന്നാണ് പ്രാഥമിക കണക്കുകൾ വ്യക്തമാക്കുന്നത്. ഡീസലിൽ ഐസോബ്യൂട്ടനോൾ ഉയർന്ന അളവിൽ ഉപയോഗിക്കാൻ കഴിഞ്ഞാൽ ഇറക്കുമതി ഗണ്യമായി കുറയ്ക്കാം. ഇത് രാജ്യത്തിന്റെ സാമ്പത്തിക ഭദ്രതയ്ക്ക് വലിയ രീതിയിൽ ഗുണം ചെയ്യും.
നിലവിൽ വിപണിയിലുള്ള ഇ 20 പെട്രോൾ വാഹനങ്ങളുടെ മൈലേജ് കുറയ്ക്കുന്നതായി പരാതികളുണ്ട്. എൻജിനുകൾക്ക് ഇത് തകരാറുണ്ടാക്കുന്നതായും വാഹന ഉടമകൾ വ്യാപകമായി ആക്ഷേപം ഉന്നയിക്കുന്നുണ്ട്.
ഈ ആശങ്കകൾ നിലനിൽക്കെയാണ് ഡീസലിലും ബയോ ഇന്ധനം ചേർക്കാനുള്ള പദ്ധതിയുമായി കേന്ദ്രം മുന്നോട്ട് പോകുന്നത്. പുതിയ നീക്കം വാഹന വിപണിയിൽ എങ്ങനെയുള്ള ചലനങ്ങൾ ഉണ്ടാക്കുമെന്ന് കണ്ടറിയേണ്ടതുണ്ട്.
