നാലാം പോക്സോ കേസിൽ സ്ഥിരംകുറ്റവാളിയായ യുവതി ഒടുവിൽ പൊലീസിന്റെ പിടിയിലായി. തളിപ്പറമ്പ് പുളിപ്പറമ്പ് സ്വദേശിനിയായ സ്നേഹ മെർലിൻ ആണ് ബുധനാഴ്ച കണ്ണൂരിൽ അറസ്റ്റിലായത്.
പ്രായപൂർത്തിയാകാത്ത കുട്ടികളെ പീഡിപ്പിച്ചതിന് ഇവർക്കെതിരെ നാല് പോക്സോ കേസുകളാണുള്ളത്. കാസർകോട് 14-കാരിയെ പീഡിപ്പിച്ച കേസിലാണ് ഈ നടപടി. കണ്ണൂരിൽ വ്യാജപേരിൽ ഒളിവിൽ കഴിയുമ്പോഴാണ് മേൽപ്പറമ്പ് പൊലീസ് പ്രതിയെ പിടികൂടിയത്.
ലഹരിവിൽപന കേസിൽ പ്രതിയായ പെൺകുട്ടിയുടെ മാതാവുമായി ജയിലിൽ വെച്ചാണ് സ്നേഹ പരിചയപ്പെടുന്നത്. പിന്നീട് ജാമ്യത്തിലിറങ്ങിയ സ്നേഹ ഇവരുടെ കാസർകോട്ടെ വീട്ടിലേക്ക് താമസം മാറ്റി. ഏകദേശം ഒരു വർഷത്തോളം ഇവർ ഈ വീട്ടിൽ തുടർന്നു.
ഈ കാലയളവിലാണ് പ്രായപൂർത്തിയാകാത്ത പെൺകുട്ടിയെ പ്രതി നിരന്തരം പീഡനത്തിനിരയാക്കിയത്. സ്കൂളിലെ കൗൺസിലിംഗിനിടെയാണ് കുട്ടി ക്രൂരത പുറത്തുപറഞ്ഞത്. പിന്നാലെ പൊലീസിൽ വിവരമറിയിക്കുകയും പോക്സോ കേസ് രജിസ്റ്റർ ചെയ്യുകയും ചെയ്തു.
കേസ് രജിസ്റ്റർ ചെയ്തതറിഞ്ഞ് പ്രതി ഒളിവിൽ പോവുകയായിരുന്നു. കണ്ണൂർ മയ്യിൽ നാണിയൂരിൽ ഫാത്തിമ എന്ന വ്യാജപേരിലാണ് ഇവർ കഴിഞ്ഞിരുന്നത്.
കൃത്യമായ രഹസ്യവിവരത്തിന്റെ അടിസ്ഥാനത്തിലാണ് പൊലീസ് സംഘം ഇവരെ വളഞ്ഞ് പിടികൂടിയത്. എഎസ്ഐമാരായ മനു, ശിവൻ എന്നിവരടങ്ങുന്ന സംഘമാണ് പ്രതിയെ കസ്റ്റഡിയിലെടുത്തത്.
ഇതിനുമുമ്പും നിരവധി ഗൗരവമേറിയ കേസുകൾ സ്നേഹയുടെ പേരിലുണ്ട്. തളിപ്പറമ്പ് പൊലീസ് സ്റ്റേഷനിലാണ് മറ്റ് മൂന്ന് പോക്സോ കേസുകളും രജിസ്റ്റർ ചെയ്തിട്ടുള്ളത്.
പ്രായപൂർത്തിയാകാത്ത സഹോദരങ്ങളെ പീഡിപ്പിച്ച കേസിലും ഇവർ പ്രതിയാണ്. വിലകൂടിയ സമ്മാനങ്ങൾ നൽകിയും ദൃശ്യങ്ങൾ കാട്ടി ഭീഷണിപ്പെടുത്തിയുമാണ് ഇവർ കുട്ടികളെ ചൂഷണം ചെയ്തിരുന്നത്.
രാഷ്ട്രീയ നേതാവിനെ ആക്രമിച്ച കേസിലും ഈ പ്രതി ഉൾപ്പെട്ടിട്ടുണ്ട്. ലൈംഗികവൈകൃതത്തിന് അടിമയാണ് പ്രതിയെന്ന് പൊലീസ് വ്യക്തമാക്കിയിട്ടുണ്ട്.
