തിരുവനന്തപുരം: സംസ്ഥാനത്തെ ശക്തമായ ഒരു മാരിടൈം സമ്പദ്വ്യവസ്ഥയാക്കി മാറ്റാൻ ലക്ഷ്യമിട്ട് യുഡിഎഫ് സർക്കാരിന്റെ ആദ്യ ബജറ്റ് പ്രഖ്യാപനം. ധനമന്ത്രി കൂടിയായ മുഖ്യമന്ത്രി വി.ഡി.സതീശൻ നിയമസഭയിൽ ബജറ്റ് അവതരണം ആരംഭിച്ചു.
അടിസ്ഥാനസൗകര്യ വികസനവും ജനക്ഷേമവും ഒരുമിച്ച് കൊണ്ടുപോകുകയാണ് സർക്കാരിന്റെ പ്രഖ്യാപിത നയം. കേരളത്തിന്റെ 600 കിലോമീറ്റർ നീളമുള്ള തീരദേശ മേഖലയെ പൂർണ്ണമായി പ്രയോജനപ്പെടുത്താൻ ബജറ്റ് ഊന്നൽ നൽകുന്നു.
സംസ്ഥാനത്തെ ജലസ്രോതസ്സുകൾ സംയോജിപ്പിച്ചു കൊണ്ട് പുതിയ മാരിടൈം ഭൂപടം നിർമ്മിക്കുമെന്ന് മുഖ്യമന്ത്രി സഭയിൽ പറഞ്ഞു.
കേരളത്തെ ആഗോളതലത്തിൽ വലിയൊരു സമുദ്ര ശക്തിയായി മാറ്റുകയാണ് പ്രധാന ലക്ഷ്യം. ഇതിനായി ‘മിഷൻ സമുദ്ര’ എന്ന സവിശേഷമായ ഒരു ബൃഹദ് പദ്ധതി മുഖ്യമന്ത്രി പ്രഖ്യാപിച്ചു.
റോഡ്, സമുദ്രം, ഉൾനാടൻ ജലപാതകൾ എന്നിവ ഇതിനായി പരസ്പരം സംയോജിപ്പിക്കും. മാരിടൈം സമ്പദ്വ്യവസ്ഥ സുഗമമാക്കാൻ സംസ്ഥാനത്ത് പുതിയ മാരിടൈം പോളിസി രൂപീകരിക്കും.
‘മിഷൻ സമുദ്ര’ പദ്ധതിയുടെ കാര്യക്ഷമമായ നടത്തിപ്പിനായി 400 കോടി രൂപ ബജറ്റിൽ നീക്കിവെച്ചു. കൂടാതെ ഒരു അത്യാധുനിക മാരിടൈം മ്യൂസിയം സ്ഥാപിക്കാൻ 50 കോടി രൂപയും വകയിരുത്തിയിട്ടുണ്ട്.
വിഴിഞ്ഞം തുറമുഖത്തെ അന്താരാഷ്ട്ര നിലവാരത്തിലുള്ള ഗ്രീൻ ബങ്കറിങ് കേന്ദ്രമാക്കി മാറ്റും. വിഴിഞ്ഞം, അഴീക്കൽ, ബേപ്പൂർ തുറമുഖങ്ങൾ മികച്ച രീതിയിൽ വികസിപ്പിക്കുമെന്നും ബജറ്റിൽ ഉറപ്പുനൽകുന്നു.
മദർഷിപ്പ് നിർമ്മാണം ലക്ഷ്യമിട്ട് പുതിയൊരു കപ്പൽ നിർമ്മാണ കേന്ദ്രവും തീരദേശത്ത് ആരംഭിക്കും. ഈ പദ്ധതികളിലെ തൊഴിൽ കേന്ദ്രങ്ങളിൽ പ്രാദേശിക തീരദേശവാസികൾക്കായി പ്രത്യേക സംവരണം ഏർപ്പെടുത്തും.
കേരളത്തെ പ്രമുഖ ഏവിയേഷൻ ലോജിസ്റ്റിക്സ് ഹബ്ബാക്കി മാറ്റാൻ 200 കോടി രൂപ നീക്കിവെച്ചിട്ടുണ്ട്. കൊച്ചി അന്താരാഷ്ട്ര വിമാനത്താവളത്തിന് സമീപം വലിയൊരു ഗ്ലോബൽ കൺവെൻഷൻ സെന്റർ നിർമ്മിക്കും.
സ്പേസ് പാർക്കിന്റെ അടിസ്ഥാന സൗകര്യ വികസനത്തിനായി 5 കോടി രൂപയും അനുവദിച്ചു.
തിരുവനന്തപുരം, കൊല്ലം, ആലപ്പുഴ ജില്ലകളെ ഒന്നിപ്പിച്ചു കൊണ്ട് പ്രത്യേക സാമ്പത്തിക മേഖല രൂപീകരിക്കും. ദേശീയ പ്രാധാന്യമുള്ള ഏകീകൃത സാമ്പത്തിക മേഖലയായി ഈ പ്രദേശങ്ങളെ മാറ്റിയെടുക്കും.
സമൂഹത്തിലെ ദുർബല വിഭാഗങ്ങൾക്കായി ‘വൺ കേരള കരുതൽ മിഷൻ’ പദ്ധതിയും നടപ്പിലാക്കും.
വിദ്യാർത്ഥികൾക്ക് നാട്ടിൽ തന്നെ തൊഴിൽ ഉറപ്പാക്കാൻ ‘കേരള നോളജ് വാലി’ പദ്ധതി വരുന്നു. ഈ വിജ്ഞാന പദ്ധതിക്കായി ബജറ്റിൽ 100 കോടി രൂപ നീക്കിവെച്ചിട്ടുണ്ട്.
വയനാട് ട്രൈബൽ സർവ്വകലാശാലയുടെ വികസന പ്രവർത്തനങ്ങൾക്കായി 50 കോടി രൂപയും ബജറ്റിലുണ്ട്.
സാമ്പത്തിക പ്രതിസന്ധികൾക്കിടയിലും കെഎസ്ആർടിസിയിലെ സൗജന്യ യാത്ര ഉൾപ്പെടെയുള്ള ഇന്ദിരാ ഗ്യാരണ്ടികൾ ഇതിനകം നടപ്പാക്കി. അങ്കണവാടി ജീവനക്കാരുടെ ഓണറേറിയം വർദ്ധിപ്പിച്ചതായും മുഖ്യമന്ത്രി ബജറ്റ് പ്രസംഗത്തിൽ ഓർമ്മിപ്പിച്ചു. യുവാക്കൾ വിദേശത്തേക്ക് തൊഴിൽ തേടി പോകുന്നത് തടയാൻ പുതിയ പദ്ധതികൾ കൊണ്ടുവരുമെന്നും അദ്ദേഹം പറഞ്ഞു.
